IPL પહેલાં હાર્દિક પંડ્યાએ વધાર્યું વજન, બદલાયેલી હેરસ્ટાઈલમાં મળ્યો જોવા

Featured Sports

મુંબઈઃ ટીમ ઇન્ડિયામાંથી બહાર આરામ કરી રહેલા ઓલરાઉન્ડર હાર્દિક પાંડ્યા વાપસી કરવા સતત પ્રયાસ કરી રહ્યો છે અને ખેલની સાથે સાથે પોતાના સ્વાસ્થ્ય પર પણ ધ્યાન આપી રહ્યો છે. આઇપીએલને હવે એક મહિનાથી પણ ઓછો સમય બચ્યો છે ત્યારે તમામ ટીમ અને તેના ખેલાડીઓ ટી-20ની તૈયારીમાં લાગી ગયા છે.

જોકે, મુંબઇ તરફથી રમી રહેલા ઓલરાઉન્ડર હાર્દિકે માત્ર રમત પર જ નહીં પરંતુ પોતાના વજન અને લુક પર પણ ધ્યાન આપ્યું છે. હાર્દિકે પોતાના ઇન્સ્ટાગ્રામ એકાઉન્ટ પર એક તસવીર શેર કરી લખ્યું હતું કે ત્રણ મહિનામાં 68 કિલોથી હવે 75 કિલો. સતત મહેનત અને કોઇ શોર્ટકટ નહીં.

પંડ્યાએ પોતાની પોસ્ટમાં બે તસવીરો શેર કરી છે. જેમાં એક જૂની અને એક હાલના સમયની છે. આ તસવીરોમાં તેનું વજન જ નહીં સાથે હેરસ્ટાઇલ અને ફોન પણ બદલાયેલો નજર આવી રહ્યો છે.

ઉલ્લેખનીય છે કે હાર્દિકે ઓક્ટોબરમાં લંડનમાં લોઅર બેકની સર્જરી કરાવ્યા બાદ છેલ્લા 6 મહિનાથી ટીમની બહાર છે. 2018 એશિયા કપ દરમિયાન તે ઘાયલ થયો હતો ત્યારબાદથી તે ટીમની અંદર-બહાર થતો રહે છે.

હાલ આઇપીએલમાં તમામનું ધ્યાન હાર્દિકના લુક અને વજનથી વધુ તેની રમત પર પણ રહેશે અને હાર્દિક પ્રત્યે મુંબઇ ઇન્ડિયન્સને પણ વધુ આશા છે. હાર્દિક હાલમાં જ ડીવાય પાટીલ ટી-20 ટૂર્નામેન્ટમાં આક્રમક રમત રમી રહ્યો છે.

રિલાયન્સ વન ટીમ તરફથી રમી રહેલા હાર્દિકે ડીવાય પાટીલ ટી-20માં મંગળવારે સીએજી વિરુદ્ધ મેચમાં માત્ર 37 બોલમાં સદી ફટકારી દીધી, જેમાં તેણે 10 તો સિક્સ ફટકારી હતી.

Leave a Reply

Your email address will not be published. Required fields are marked *