મહારાષ્ટ્રની થાણે સેશન્સ કોર્ટે એક ગે પુરુષની આગોતરા જામીન અરજી ફગાવી દીધી છે. આ 32 વર્ષીય વ્યક્તિ પર આરોપ છે કે તેણે લગ્ન પહેલા સમલૈંગિક હોવાની હકીકત છુપાવીને મહિલાને છેતરી હતી. આટલું જ નહીં, તેણે મહિલાને ‘ઈમ્પ્રેસ’ કરવા માટે નોકરીની નકલી ઑફર પણ બતાવી.
ખરેખર, આરોપી પુરુષ અને મહિલાની મુલાકાત એક ઓનલાઈન પોર્ટલ દ્વારા થઈ હતી. થોડી મુલાકાતો બાદ બંનેએ લગ્ન કરવાનો નિર્ણય લીધો અને 20 નવેમ્બર 2021ના રોજ લગ્ન કરી લીધા. જોકે લગ્નના ત્રણ મહિના બાદ બંને અલગ રહેવા લાગ્યા હતા.
સરકારી વકીલ વી.એ. કુલકર્ણીએ કોર્ટને જણાવ્યું કે આ વ્યક્તિ સામે અસામાન્ય આરોપો છે. તેણે મહિલા સાથે લગ્ન કરતા પહેલા તેની સમલૈંગિકતાને છુપાવી હતી. ફરિયાદી મહિલા જે આરોપીની પત્ની છે તેની સાથે છેતરપિંડી કરવામાં આવી હતી અને તેનું જીવન અને ભવિષ્ય બરબાદ કરવામાં આવ્યું હતું.
બીજી તરફ, આરોપી પતિનો ફોન જપ્ત કરનારી પોલીસ તપાસ ટીમે કોર્ટ સમક્ષ જણાવ્યું હતું કે પુરુષ અને તેના અન્ય પુરુષ પાર્ટનર વચ્ચે ઘણી ચેટ અને મેસેજ આવ્યા છે. તેમની વચ્ચેની વાતચીત સ્પષ્ટપણે દર્શાવે છે કે આરોપીને સમલિંગમાં રસ હતો એટલે કે તે ગે હતો. એટલું જ નહીં, તે એક ચેપી રોગથી પણ પીડિત હતો.
તપાસ અધિકારીએ કોર્ટને કહ્યું કે ‘નકલી જોબ ઓફર લેટર’ના પાસાની તપાસ કરવાની છે. અધિકારીએ કહ્યું કે જો આરોપી વ્યક્તિને આગોતરા જામીન પર છોડવામાં આવે તો તે તપાસ માટે ઉપલબ્ધ ન હોય અને સાક્ષીઓને ધમકી આપી શકે. અધિકારીએ આરોપી પતિની કસ્ટડીમાં પૂછપરછનો આગ્રહ કર્યો. જે બાદ કોર્ટે આરોપીની આગોતરા જામીન અરજી ફગાવી દીધી હતી.
ફરિયાદી મહિલા પોતે વકીલ સાથે કોર્ટમાં હાજર હતી અને તેણે કોર્ટને કહ્યું કે તે વ્યક્તિ (પતિ) માત્ર મારા માતા-પિતા પાસેથી આર્થિક મદદ માંગે છે. મહિલાએ કોર્ટમાં કહ્યું કે તેને લગ્નના ખર્ચ સહિત 18 લાખ રૂપિયાથી વધુનું નુકસાન થયું છે.
કોર્ટમાં એ વાત પણ સામે આવી હતી કે લગ્ન પછી જ્યારે દંપતી હનીમૂન માટે ગયા હતા, ત્યારે આરોપી પતિએ બીમારીના બહાને સંબંધ બાંધ્યો ન હતો, જેથી તે સમલૈંગિક હોવાની ખબર ન પડી. જોકે, થોડા દિવસો બાદ જ્યારે પત્નીને તેના મોબાઈલ પર પુરુષ મિત્રો સાથેના સંબંધોના પુરાવા મળ્યા તો તે આશ્ચર્યચકિત થઈ ગઈ. પતિના મોબાઈલ ફોનમાં ઘણી તસવીરો અને વીડિયો હતા, જેમાં તે તેના પુરૂષ મિત્રો સાથે સંબંધ બાંધતો હતો.