મુંબઈ: રિલાયન્સ જીયોએ તેમની એજીએમ મીટિંગમાં હાઈબ્રીડ સેટ-ટોપ-બોક્સની જાહેરાત કરી હતી. તે સેટ-ટોપ-બોક્સ યુઝર્સને ટીવી સર્વિસ, કન્ટેન્ટ અને અન્ય સેવાઓ JioFiber બ્રોડબેન્ડ કનેક્શન દ્વારા ઉપલબ્ધ કરવામાં આવશે. જોકે આ સેટ-ટોપ-બોક્સનો કોઈ પ્રીવ્યુ અથવા ડેમો આપવામાં આવ્યો નથી.
હવે રિલાયન્સ જીયોના હાઈબ્રીડ એસટીબીના ઈમેજને એક યુઝરે રજૂઆત કરી છે. આ ઈમેજ DreamDTHએ શેર કરી છે. આમાં રિલાયન્સ જીયો હાઈબ્રિડ એસટીબી બ્લૂ કલરમાં જોવા મળ્યું છે. તેમજ બોક્સના ટોચના સેન્ટરમાં કંપનીની બ્રાંડિંગ દેખાય છે.
ઉલ્લેખનિય છે કે, રિલાયન્સ જીયો ગીગાફાઈબર સર્વિસ 5 સપ્ટેમ્બરે લોન્ચ કરવામાં આવશે. જીયો ગીગાફાઈબરની જાહેરાત દરમિયાન કંપનીએ આવનારા ગીગાટીવી સેટ-ટોપ બોક્સ વિશે તમામ જાણકારી આપી હતી. જે કસ્ટમર્સને ઓટીટી, લાઈવ ટીવી, વીડિયો કોલિંગ અને ગેમિંગની સુવિધા આપશે. જોકે કંપનીએ એવું નથી જણાવ્યું કે સેટ-ટોપ બોક્સ કેવા પ્રકારનું જોવા મળશે.
જાહેરાત દરમિયાન કંપનીએ જણાવ્યું હતું કે, સેટ-ટોપ-બોક્સમાં 4K રેઝલૂશનની સાથે મોટાભાગની ભારતીય ભાષાઓમાં વોઇસ કમાન્ડ હશે. આ ઉપરાંત સેટ-ટોપ-બોક્સમાં મલ્ટી પાર્ટી વીડિયો કોન્ફરન્સીંગની પણ સુવિધા હશે. રિલાયન્સ જીયો ગ્રાહકોની પસંદ પર 600થી વધુ ટીવી ચેનલ, એક હજારથી વધુ મૂવી અને લાખથી વધુ ગીત ઉપલબ્ધ કરવામાં આવશે.
